Улаан хэрэм
Эрхлэн гаргасан: Хайтан студи
- ISBN: 978-99929-1-960-4
- Хавтас: Зөөлөн
- Хэвлэгдсэн он: 2010
- Хуудас: 475
- Хэмжээ: 205*145мм
- Жин: 600
- Үлдэгдэл: Дууссан
Би явъя даа!...
Дайх, Мянган-угалзтын даваан дээр зүтгүүлсээр байгаад гарч ирэв. Машинаа зогсоож, хаалганыхаа шилийг доош болгон, гадагш харвал, гэрлийн сэжүүрт давааны их овооны баганхи хэсэг нэвсийсэн цасан дор бөмбийн харагдана. Машины гэрлээс цаас нүдэнд харагдах юм алга. Ердөө хөмөрсөн тогоо мэт бив битүү хар юм нүүгэлтэнэ. Машины радиатор уур савсан шуугиж, сийгэж, ус пор пор буцлан нүүр лүү бүлээн амьсгаа үлээнэ. Дахиад цас орох нь. Тэгэхдээ, бүр хэзээ мөдгүй орох нь. Эн даваагаар Дайх 1975 оноос хойш өвөл хавар хичнээн удаа давлаа даа. Тэгэхэд өвөл хавар байтугай зарим үед зун, намар, дээлийн хормой тас татах шахсан хүчтэй салхитэй үе бишгүйдээ тохиолдож байв. Гэтэл өнөөдөр хэдэн билээ? Арван нэгдүгээр сарын хорин хоёр. Даваан дээр салхи гэхээр юм даанч алга. Радиаторын бүлээн уур нүүрэнд мэдэгдэж байгаагаар, салхи хөдөлбөл эгц өмнөөс хөдлөх юм байна гэдгийг Дайх мэдэж байв. Аав нь, "Чамайг 1975 онд аймгаас сум нэгдэлдээ шилжиж ирсэн жил, манай энэ нутаг нэг л эвгүй, тэгэхдээ дандаа зүүн хойноос үлээдэг ийм хачин салхитай болсон юм. Түүнээс урьд салхитай байсан, гэхдээ ийм салхи байгаагүй юм. Би түүнийг мэдэлгүй яахав. Цэрэгт алба хааж, Завхан аймгийн 32-р морьт хоро, Баян-Түминий 5 дивизийн 28-р морьт хороонд зэвсгийн түгээгч хийж, хэдэн жил болсныг эс тоолбол бусад бүх насаа энэ нутагт өнгөрөөсөн юм чинь мэдэлгүй яахав. Өөрөөр хэлбэл жар шахам жил энэ нутагт аж төрлөө. Тэгээд манайхан савхийвэл зүүн хойноос үлээдэг энэ салхийг Алтайн хөх салхи гэж нэрлэх болсон юм" гэж хэлснийг санав.
